Datuak Dalu

Dunsanak kasadonyo....Salam Dahsyat ala Mr. Tung DW...
Iko carito tantang surang tukang ubek tahun 80-an. Mungkin kok dunsanak ambo nan ndak hobi main-main di pasa ateh Bukittinggi (tamasuak anak-anak mudo kini) indak ka kenal jo gaek nan surang ko doh. Profesinyo "tourist guide" di Kandang Ampek (Lembah Anai) jo tukang ubek.

Dimaso itu tiok hari Rabu jo Sabtu kan hari pakan di Bukittinggi, sabana rami urang kalau hari pakan ko. Dari urang manggaleh sampai ka tukang cacak panen tu mah.
Wakatu tu ambo sadang sikola SD. Pulang sakola kalau hari pakan tu lah bakumpua kami di rumah kawan ambo nan banamo si Tembem (dek pipinyo kimpuih mah sanak:) Paliang indak barampek urang kami jo nan lainnyo pai raun bajalan kaki dari Tarok sampai ka pasa. Kadang kadang pai batarompa , kadang-kadang bakaki ayam se nyo.

Kok hari pakanko iyo banyak tukang ubek nan mambuka praktek.Saingek ambo nan paliang rami dicaliak urang Bang Acep, Bang Yunus jo Datuak Dalu. Ado nan mambao ula gadang untuak manarik urang , ado nan bagandang -gandang ala India. Nan paliang sanang bana ati ambo mandangan ota tukang ubek iyo nan acok dipanggia "uncle DD" atau Datuak Dalu ko. Sabana ahli nyo dibidang ko. Kok dibandiangkan jo caro kini public speaking nyo yo sabana top. Mulai maota bacaruik pungkang sampai baaso inggirih pandai gaek ko mah. Kadang-kadang awak bagai nyo pacaruik-an mah, tapi dek lamak caro mambaokkannyo indak tahu awak kalau nyo pacaruik-an hahahaha....Nan hebat hebat lai sanak nyo pampangkanlah poto-potonyo berpose ala pejabat nagari waktu itu.Nan paliang mirip bana nyo bapoto saroman bana tampangnyo jo Wakil Presiden wakatu itu yaitu Pak Umar Wirahadikusumah, sabana mirip sanak!

Kok lah baliau nan manggaleh yo rami bana urang nan manonton. Tapi kok ambo ingek-ingek nan manonton ko samo banyak pulo antaro urang gadang jo anak-anak. Kalau mode kami ko nan manonton tahu selah sanak, lah pasti indak ka mambali ubeknyo doh. Makonyo anak-anak ko acok kanai hariak. "anak-anak duduak, anak-anak duduak !" baitu keceknyo.Dek ingin manonton tantu awak tapaso patuah sajo.

Kok ubek nan dijuanyo katonyo dari lua nagari ko mah sanak. Otanyo kalau baliau manjadi guide turis acok buluih alias indak diagiah pitih dek bule. Jadi daripado rugi mako nyo mintaklah ubek nan dibao turih ko. Ota nyo lai kalau turih-turih ko salalu mambao ubek paten dari nagarinyo mah.
Nan acok bana katonyo nan dibao turih ko ubek sakik paruik karano makanan urang awak ko kan banyak ndak cocok jo bule-bule ko. Jadi kok sakik paruiknyo tingga makan ubek nan dibaoknyo.

Dek Datuak Dalu ubek tadiko nyo agiah lah namo "ATOM" yang bararti "Allah Tolong urang Muslim". Dek pandainyo Gaek ko memasarkan ubveknyo melalui ota ko banyaklah urang nan mambali ubek ko. Memang nampak dek ambo indak sampai 10% dari urang nan manonton nan sato mambali doh. Soalnyo waktu sadang lamak-lamaknyo gaek ko maota iyo rami urang, tibo masonyo ka manjua ubek, baransua-ansua urang ilang ciek-ciek.

Guno ubeknyo sanak untuak pailangan sakik paruik. Kok dimakan ubeknyo ko indak sampai limo minik dek curu paruik urang, mambocor urang dibueknyo. Antah apo pil nan nyo agiah antahlah. Mungkin sajo pil broklak nan nyo jua ko.
"Puiiik kecek kantuik, caaar ciik tapanca !" baitu kato Datuak Dalu maulang ulang motto galehnyo.

Jadi sanak, caro Datuak Dalu manjua ubek jo mayakinkan calon pambalinyo kolah nan sanang ambo mamparatikan. Ciek lai kemampuan baso inggirihnya kok dinilai jo caro TOEFL kini lah 600 labiah mungkin. Andaikan sajo sales-sales nan badasi nan banyak bakuliliang kampuang manjua macam-macam barang mulai dari parfum sampai alat paisok kabuik ko pandai maota gaya Datuak Dalu ko, ambo yakin capek galehnyo laku mah. Kok iduik jolah Gaek ko iyo ambo undang agak sakali duo kali untuak malatiah anak buah ambo "teknik pemasaran" ala Datuak Dalu ko.....