Pakiah Sunguik

Dunsanak kasadonyo.....Salam super gaya pak mario teguh.
Iko curito dari kampuang ambo, tapeknyo kampuang inyiak ambo.Tasabuiklah surang guru silek (kok caro kampuangnyo pandeka ) di kampuang ko panggilannyo tantuo datuak mangkuto rajo. Baliauko sabana santiang basilek. Namonyo silek harimau. Kok ujian nyo iyo ndak tangguang-tangguang sanak, untuak mamutuih ilmu awak harus basilek jo inyiak balang.

Diantaro sakian banyak murik tantuo ko ado duo urang nan paliang nyo sayang. Istilah keren nyo asisten pelatih. Jadi kalau tantuo ko indak bisa malatiah baliau-baliau nan baduo kolah nan turun. Nan surang acok dipanggia Uwo Cigin, nan surang lai Pakiah Sunguik. Kalau Uwo Cigin ndak usah dicaritokan bana lai dari namonyo sajo lah jaleh larinyo kancang alias cigin. Nan bakasan ko iyo Pakiah Sunguik. Ba kok dipanggian baitu sanak ? dek sunguiknyo taba, itam malantiang.

Kok dari cari maaja antaro kaduonyo indak jauah-jauahn bana salisiahnyo, aratinyo dek ilmunyo samo tinggi tantu murik-murik lai indak susah bana maikuik-i kaduonyo.
Tiok latihan di sasaran tiok patang satu malam minggu di sabalah surau tangah, rami bana urang nan manonton. Sababnyo kalau malam minggu ko pasti diadokan spraing partner antaro anak asuahan Uwo Cigin jo Pakiah Sunguik. Onde sanak kalau lah tibo wakatu macamko iyo langsuang bakabuik sakaliliang sasaran ko. Dan biasonyo manuruik tantuo kalau lah bakabuik ko inyiak balang lah sato pulo manonton mah. Kecek baliau lai kalau adi inyiak ko latihan harus serius karano kalau main-main alamaik ka berang inyiak ko. Nyo simbua sasaran ko jo kasiak !

Sakali wakatu diadokanlah ujian naiak tingkek disasaran ko. Bak kato tadi untuak mauji kamampuan murik ko iyo diadu surang lawan surang. Tantu nan diadu antaro asuahan Uwo Cigin jo Pakiah Sunguik. Majulah nan partamo si Poyon dari suduik Uwo Cigin malawan si Suman murik Pakiah Sunguik. Sasudah malakukan penghormatan ka guru jo panonton mulailah duo pandekako main. Mulo -mulo nan ditampilkan tantu banyak bungo-bungo nyo sajo.Sasudahtu barulah kalua jurus-jurus andalan masiang- masiang. Lah sepoh manyepoh jo tungkai manungkai kaduonyo. Kok diparatikan nampaknyo barimbang sajo kaduonyo, bahkan labiah rancak saketek mainnyo murik Pakiah Sunguik.
Lah limobaleh minik main, masih lamak juo baru jurus-jurus kaduonyo. Kok si Poyon manyipak ditangkok dek si Suman. Si Suman maninju nyo tangkis dek si Poyon. Kadang-kadang urang ko lag baguluang-guluang ditanah dek saliang mangunci.

Sampai di puncak main ko, nyo pakailah dek si Suman jurus sipak balakang. Kok di randai sia namonyo ko pandeka nyo nan terkenal bisa manyipak madok bulakang ? Kok di shaolin she tendangan ekor naga mah istilahnyo. Kok di karate namonyo "ushiro mawashi geri" mah namnonyo.
Jadi sanak dek samparononyo maayun kaki suoknyo tajilapaklah si Suman ko. Maklumlah sasaran ko licin sangaik dek tanah padek basiram jo aia.

Tajilapaknyo di posisi taduduak persis cando urang tapijak pokok pisang nan lah busuak.
Mancaliak kawanko tajilapak tagalak urang kasadonyo. Tapi sanak diantaro nan banyak ko nan paliang takikiak galaknyo pakiah sunguik ko, sampai nyo pacik paruiknyo dek galakko. Mancaliak Pakiah Sunguik ko galak gadang yo tapuirangan si Suman jo murik Pakiah Sunguik nan lain. Ba a ka indak sanak anak buahnyo surang nan jatuah inyo pulo nan paliang gadang manggalakkan. Akianyao pas diumumkan hasil akhir ujian malamtu saindaknyo ado tigo urang anggota Pakiah Sunguik ko ndak naiak tingkek. Tapi anehnyo sanak bagi Pakiah Sunguik bantuak ndak ado masalah sajo doh. Bahkan acok nampak de urang Pakiah Sunguik ko labiah acok maota jo bagarah samo anggota Uwo Cigin daripado jo anggotanyo surang. Jadi baitulah curito Pakiah Sunguik ko. Kok Dunsanak jadi pemimpin sarancaknyo jan lah ditiru kulikaik Pakiah Sunguik ko. Alamaik ka banci kasado anak buah sanak jadinyo....