Dirty Dozen

Dunsanak kasadonyo....
Lah ampia anam bulan pulo ambo mutasi ka bagian baru di kantua ko.kok buliah dikatokan efektifnyo kurang labiah 4 bulan, karano ambo cuti gajah lo sabulan lamonyo.Disiko ado tradisi nampaknyo kok ado nan sakik hati atau sakik gigi rancak maambiak cuti gajah daripado mangamuak-ngamuak di kantua.

Alkisah masuak karajo sudah cuti ko lai agak segar utak caro indonesianyo.Salamo cuti iyo rangkik-rangkik badan ambo deknyo. Ambo balilah kasiak saoto, semen sakaruang, sendok semen, kuas dan sagalo alaik untuk mambuek pot bungo. Caritonyo ambo ka mambuek pilar untuak paga rumah di jambu aia. Lah tagalak rang gaek ambo deknyo (mungkin dalam hatinyo" lah labiahlo gilo pado kayo" komah anak ambo ko :)Saminggu lah balalu alun jadi juo cetakan pilar ko lai. Lah abih semen saembe ketek.Macam-macamse masalahnyo.Nan malakeklah cetakannyo, nan patahlah. Sampai paniang pulo ambo saketek.

Kiro-kiro sapuluah hari jadi juo barangko dunsanak, ndak tangguang-tangguang langsuang duo buah ambo buek.Percobaan mancetak hari pertamo sukses.Barikuiknyo alhamdulillah lai aman-aman sajo.Hinggo abih maso cuti ko jadi juolah pilarko sabanyak 24 buah.Kurang 10 lai manuruik etongan ambo.

Baliak ka carito mutasi tadi.Bakumpualah diruangan bakeh tampek rapekko muncak-muncak dari bagian ambo nan lamo jo bagian nan dakek wese dimuko lobi.A..nan tagalak ambo iyo urang-urang nan jadi konco ambo kiniko.Takana dek ambo pilem Dirty Dozen nan dibintangi Charles Bronson tahun 70-an kalau ndak salah.

Bagitu surek mutasi tibo, siap-siaplah ambo maambiak ancang-ancang mancari posisi nan nyaman diruangan baru ko. Nampaknyo ado tampek disuduik nan agak nyaman.
Tiok ari ambo pantau-pantaulah bilo ka tibo "D" day pindah dari tampek lamo.
Suatu ari sinayan ambo datang subuah-subuah ka kantua ko sanak. Sabananyo tiok sinayan pun ambo pasti datang paliang pagi karano pasti barangkek pagi dari kampuang.Dapeklah kaba dari inyiak satpam nan mangatokan baso ari ko wajib pindah ka ruangan baru ko. Jadilah ambo jo inyiak tadi maangkek-angkek meja jo kurisi ka tampek baru ko.Istilahnyo alun pulang maliang lai ambo lah salasai pindah. Bak cando urang lari malam sajo.

Ruponyo sanak, di ruangan baru ko ase nyo alun salasai lai doh. Namonyo awak tingga di kota tapi lauik tantu udaro ko angek allahurabbi. Samantaro konco-konco ambo nan sanasib yo alun ado nan pindah lai. Banyak nan batahan jo alasan ruangan alun salasai. Tinggalah ambo surang di ruangan sagadang ampuah ko. Tapi ambo pakai ilmu basi sajo alias basipakak jo basibanak.
Kok lah angek ari jam 10 kateh tu ambo bae se lalok-lalok ayam di musola. Matiselah dalam ati ambo.

Soal ase tadi ampia saminggu alun juo nyo pelokkanlai de urang nan kompeten. Macam-macam se alasannyo nan listrik ndak cukuiklah pokoknyo saribu satu alasan. Adoa surang kawan ambo nan tiok sabanta heboh dek masalah ase ko. Ruponyo baliauko alah baketek-an ati pulo jo kawan nan mauruih ase ko. Kasudahannyo kan iyo, daripado kawanko heboh sajo tiok ari, jadi bialah ambo nan jadi penghubung (istilah kerennyo jadi jubir:) jadi ambolah tiok sabanta maulang-ulang masalah ase ko taruih.Ruponyo indak itu sajo doh sanak akianyo sagalo masalah ruanganko nyo sarahkan ka ambo untuk mauruih . Jadilah ambo ketua kelas de facto cando di esde saisuak. Kok diawak saisuak ketua kelas ko kan iyo untuak disuruah- suruah sajo mah.

Barakaik tiok sabanta nyinyia batanyo akianyao ase ko salasai juo. Lah dingin kini ruangan kami ko.Lah salasai masalah ? alun lai juih ! Tibo masalah baru. Diantaro kawan nan saruanganko ado nan ahli hisab alias suko paisok. Kok dulu di ruangan lamo ambo cuek sajonyo , ka maisok di ruangan ase tu maisoklah. Tapi kini disiko ado nan ndak suko jo asok ko. Terjadilah parang dingin antaro ahli hisab ko jo cigarret hater tadi. Antah sia nan punyo karajo bahambuangkanlah asbak rokok ko ka lua. Biasuaknyo lah ado lo baliak. Pernah ampia bacakak kawanko.

Masalah kaduo tibo pulo, ruponyo induak samang urang nan ndak tahan ase. Awak manyetel 19 nyo setel 24 derajad celcius, baitu se tiok ari. Memang ibo juo ambo mancalaik induaksamangko batuak-batuak tiok ari, tapi ba-a lai.

Masalah katigo dunsanak, pintu ruangan induaksamang ko sarupo jo pintu bar (saloon caro koboinyo). Namonyo pintu dipakai tiok sabanta kalua masuak tantu rusaklah engsenyo.Ado nan tangga bauiknyo ada nan lapeh pasaknyo, sainggo lah bantuak pintu pasa sudah kamaliangan. Dek ndak lamak mancaliak pintu miriang sabalahko ambo pailah mancari tukang pelokkan di bagian perlengkapan. Manuruik kawan disinan juo proyek ruangan baruko masih dalam maso pemeliharaan, nyo suruahlah anggota mamelokkan. Tapi nampaknyo indak bisa doh. Satu-satunyo jalan engse pintuko diganti. Cuma kontraktor ko tantu sibuk pulo.Lai ka mungkin pintu ciek ko nan kadiuruihnyo. Jadi sampai kini pintu ko tingga sabalah se lai nan tapasang. Sakali induak samamngko lai mangicek supayo rancak dibongka se kaduonyo, cuma alun sempat-sempat juolai ambo mintak tolong.Jadi sanak sampai kini pintu ko tingga sabalah se lai nyo. Kaba-kabanyo alun bapelokkan dek anduang tukang ko alun siaiklai.

Cieklai sanak untuak keakraban di ruanganko sampai pulo kami mabuek julo-julo cando induak-induak.Tokenyo lai karyawan cewek nan satu-satunyo di ruanganko.Lah jalan sakali puta. Dapek duo juta ampekratuih lumayan. Cuma sayang nan dapek bukan ambo. hahahaha :)