"MINYAK TAK ADE"

Iko carito wakatu ambo batugeh di Rengat ko sanak, mulai bulan September 2007 sampai Desember 2008 ambo dimutasikan ka kota Rengat. Sabana takajuik ambo sanak, baa ka indak raso-rasonyo cando patuih disiang bolong wakatu kawan ambo maantakan surek mutasi ko malam-malam jam 8 lah kiro-kiro.

Sabananyo bana sanak wakatu itu ambo lai diagiah kesempatan pulo untuak "manulak" mutasi ko alasannyo memang iyo ambo baru 10 bulan di tampek baru. Tapi sanak, kok dipikia dipatimbangkan wakatu itu memang agak barek. Ibaraik makan buah simalakamo pulo, masalahnyo kok ambo indak namuah mutasi level ambo antah bilo ka naiak, samantaro kok ditarimo iko anak nan ketek baru 2 bulan umuanyo, tambah pulo tampek karajo di Rengat ko baru sudah tabaka pulo jadi kan bisa sanak bayangka baa kiro-kiro kondisi nan ka ambo alami disitu.

Tapi ambo iyo ndak pernah mambantah doh, nan diati ambo baa juo iko kan samantaro. Jadi keputusan ambo ditarimo sajo dulu walaupun urang rumah ambo sabananyo bana ingin manulak kareh-kareh. Bayangkanlah 17 tahun karajo lah pindah tampek karajo 10 kali, kok pindah rumah antahlah ndak taetong kalinyo doh. Lah cando pengungsi vietnam jaman saisuak pulo rasonyo. Kok arato iyo ala kadarnyo sajo, nan paralu kopor butut jo tipi untuak hiburan senek. Sabananyo lah tabik tangih urang rumah maikuti ka ma ambo dinas mah, malawan se nan nyo ndak namuah nyo.

Kadang ambo batanyo pulo dalam ati sanak, apolah pikiran bos-bos ambo nan diateh tu mamindahkan urang tiok sabanta. Tahu bana nyo awak urang nan patuah-patuah sajo salamoko mah. Kasudahannya kan iyo bangkik suga juo ambo akianyo manacaliak kondisi ko.

Tapi sabananyo indak itu nan ka ambo caritokan doh. Baiko sabananyo...
Wakatu pindah ka Rengat ko kan iyo BBM sadang sarik-sarik bana. Bensin dima-dima abih, solar disagalao SPBU putuih. Kok kapai kalua kota iyo tapaso baminyak serap agak sa dirijen, kok indak ? alamaik ka bamalam ditangah ribo awak mah.

Di Rengatko sanak, samo sajo kondisinyo. Bahkan mungkin labiah parah. Bayangkan di kota nan lumayan gadangko SPBU nyo cuma satu-satunyo. Kok kecek ambo lah monopoli mah :) Dek minyak gantuang kan iyo kalau urang awak ko oportunitis sangai. Banyak dunsanak awakko jo alasan ekonomi macam-macamlah manjadi spekulan BBM ko. Kok urang bansaik sajo nan main mungkin dapek juo kito tarimo , tapi nampak dek ambo ado nan malangsir bensin ko pakai oto hardtop, sudahtu teng minykanyo dobol pulo. Pernah sakali ambo maisi bensin dibalakang otoko, ondeh mak antah bara puluah liter isinyo (mungkin alah ratusan liter) Antah kok dorom nyo buek ka tengki minyaknyo antahlah.

Nan manggalitik bana iyo pengumuman kalau wakatu bensin atau solar ko abih sanak. Kok di Padang atau Bukiktinggi nampak dek ambo acok nyo umumkan jo tulisan " Bensin habis atau solar habis " Tapi sanak kalau di Rengat sabana lain. Antah indak mangarati urang disiko jo kato-kato "habis" ko antahlah. Nan jaleh sanak kalau sempat sanak ka Rengat dan kabatualan bensin/solar habis, jan ka diharok ado tulisan saroman diatehtulai di SPBU Rengat. Disiko pengumumannyo babaunyi " MINYAK TAK ADE " (minyak indak ado alias minyak tidak ada ) hahaha :)